Дали е државна тајна производната цена на струјата од РЕК Битола?

Добивај вести на Viber

Која е производната цена на еден мегаватчас струја во РЕК Битола е прашање за милион долари! „Фактор“ цели две недели трпеливо чекаше одговори на едноставни прашања кои се однесуваат за производната цена на струјата за годинава и за лани. Чекаме безуспешно. Дали производната цена на РЕК Битола е повисока од цената на берза? Не знаеме. Дали производната цена навистина е државна тајна? Не и не смее да биде. Исто како што ЕСМ не смее, но ги крие податоците за тоа кога купува, колкави количини и по кои цени плаќа за секој купен мегаватчас годинава... Додека јавноста ја занимаваат со лизингот на функционерските коли бизнисот со струја на ЕСМ (купување и продажба н.з) чини милиони евра неделно!

Втора недела нема одговор од ЕСМ , државната компанија за производство на електрична енергија, за тоа колкава е производната цена за еден мегавачас струја што ја произведува најголемиот рударско-енергетски комбинат во земјава лоциран во пелагониската општина Новаци.

Раководството на ЕСМ во ниту еден момент не се почувствува повикано да одговори и да го демантира Дејан Трајковски, професор на битолскиот технички факултет кој јавно тврди дека производнаа цена на мегаватчас во битолскиот комбинат е над 140 евра и дека РЕК Битола произведува загуба.

Според неговата теза објавена на неговиот профил на социјалните мрежи главна причина за високата производствена цена е увозот на нискоквалитетен грчки јаглен во комбинација со експлоатацијата на домашните рудни наоѓалишта кои ги користи РЕК Битола.

За жал не можеме да дадеме контекст на значењето на РЕК Битола за македонското производство на струја затоа што електропреносниот систем-оператор МЕПСО е целосно хакиран и неговиот сајт е недостапен за увид. На тој сајт во диспечерските месечни извештаи ги има податоците за производство на електрична енергија во македонскиот систем.

Во овој момент единствен релевантен извор на податоци е сајтот на Регулаторната комија за енергетика, но таму се објавуваат само годишни извештаи.

Во недостиг на официјални податоци за производната цена на струјата од најголемиот производител на струја се наметнува дилемата дали РЕК Битола произведува струја по цена која е повисока од таа по која струјата се тргува на некоја од берзите во нашиот регион. А ЕСМ не наоѓа за сходно да демантира и да аргументира дека тоа не е така.