Добивај вести на Viber
Грчкиот премиер Андонис Самарас изјави дека неговата земја не сака нова меѓународна спасувачка финансиска програма и посочи дека претстои нов план за економски реформи. Оваа изјава тој ја даде за време на посетата на Берлин по средбата со германската канцеларка Ангела Меркел.
Самарас исто така, посочи дека Грција би требало да може да излезе порано од меѓународната спасувачка програма и да ги покрива своите финансиски потреби од следната година. Ова е прв случај кога Атина јавно изразува надеж да се справи без спасувачки транши догодина.
"Сега Грција може да стои исправена на свои нозе и сметаме дека не треба нов спасувачки пакет", рече грчкиот премиер.
Премиерот додаде дека неговата земја наскоро ќе претстави "свој рамка за продолжување на реформите во следните години надвор од програмата на спасувачките спогодби".
По повод соработката со ММФ, грчкиот премиер рече дека тоа не секогаш било лесно, но "дефинитивно го променило изгледот на грчката економија".
"Сметам дека оваа соработка ќе заврши предвреме. Ако тоа се случи, тоа би било успех, а не развод", истакна Самарас. "Верувам дека дефинитивно би можеле да ги покриваме своите финансиски потреби од следната година. Ќе видиме што ќе се случи со следните транши ", рече уште тој.
Грција од 2010 година се потпира на два спасувачки пакети во вкупна вредност од 240 милијарди евра. Плаќањата од партнерите од еврозоната треба да завршат оваа година, а овие од Меѓународниот монетарен фонд - во 2016 година.
Во меѓувреме Меркел ја пофали Грција за спроведените реформи, истакнувајќи дека "првите плодови на успехот се видливи".
"Знам низ каков тежок период поминува Грција и колку луѓе се невработени, но првите плодови на успехот се видливи и ние ќе сториме сé, од германска страна, за да ја поддржиме во овие напори", рече Меркел на заедничката прес-конференција со Самарас.
"Многу радосно е дека има позитивни сигнали во Грција", додаде таа.
Меркел истакна дека земјата е на пат да се врати кон раст по една многу добра турстичка сезона, според неа најмногу благодарение на Германците. Германија е државата која има најголем придонес во спасувачките кредити за Грција.
К.К.