Дали наскоро ќе имаме заладување и снег?
Објавено во: Македонија 08 Ноември, 2023
Во Македонија продолжува серијата на влажни воздушни бранови кои доаѓаат од Атлантикот.
Нови врнежи кај нас се очекуваат веќе од петок, па за време на викендот и повремено тие ќе бидат обилни и локално проследени со појава на грмежи, како и со засилен до повремено силен ветер од јужен и од југозападен правец.
„На високите планини (над 2000 м.н.в повремено ќе има врнежи од снег). Не се исклучува можноста повремено снежната граница во западните и во северозападните предели да се спушти и под 2.000 метри. Во петок и во сабота на повеќе места ќе дува засилен, повремено силен ветер од јужен и од југозападен правец (повремено и локално со брзина од над 60 км/час). Локално до самиот крај на оваа седмица повторно ќе наврне значително количество на воден талог, и тоа нови над 30 л/м2 воден талог. Инаку со последниот влажен воздушен бран од Атланикот, најмногу дожд кај нас наврна во Дебар, и тоа 38 литри дожд. И во Скопје и околината од петок се очекуваат нови врнежи од дожд и проследени со засилен ветер од јужен правец. Температурите во следниот период ќе бидат пониски и тоа поради продорот на постуден воздух од север, и максималните дневни температури на воздухот ќе се искачуваат во интервалот од 10 до 18 степени. Минималните температури пак ќе бидат исто така се пониски и на многу места ќе се спуштаат до околу, па и под 5 степени, а понекаде, особено во Малешевијата тие ќе се спуштаат и до околу -2 степени, со што го очекуваме и првиот мраз за оваа сезона, не само во Малешевијата, туку и на други места низ Македонија“, вели метеорлогот Славчо Попоски.
Ако вака останат работите, уште поголемо заладување на времето кај нас ќе има околу 20 ноември, и тогаш освен на повисоките места и на планините, снег се очекува и во градовите во Македонија.