Дали Пешевски ќе го „турка“ задолжувањето со еврообврзницата?

Добивај вести на Viber

Незадоволен од капацитетот на министерот за финансии Кирил Миноски, Никола Груевски денеска го поставил проверениот Владимир Пешевски за главен играч во продолжението на издавањето на еврообврзницата од 650 милиони евра, се наведува во соопштението на СДСМ.

„Во седумминутната телефонска врска со потенцијалните инвеститори којашто ја водел Пешевски, според информациите што ги имаме, како соучесници биле присутни и министерот за финансии, министерката за информатичко општество и администрација, заменик министерката за правда и се разбира верниот послушник на Груевски, гувернерот на НБРМ Димитар Богов. По кратката седумминутна телефонска врска, состанокот бил завршен. ДУИ очигледно се обидува да се затскрие, со тоа што на телефонскиот состанок со инвеститорите не присуствувал министерот за правда, но според информациите што ги имаме тој сепак, по налог на својата партија и дал овластување на заменик министерката од редовите на ВМРО-ДПМНЕ да потврди од името на Министерството за правда, дека постапката за издавање на еврообврзницата е согласно законите“ - реагираат од СДСМ.

Од партијата сметаат дека молкот на ДУИ по ова прашање упатува на тоа дека Али Ахмети се испазарил како и многу пати до сега со Никола Груевски.

Дали ќе имаат за леб граѓаните, никогаш не било во сфера на нивниот интерес, додаваат од СДСМ.