Де Прето бара развој на инфраструктурата, Јанакиески се пофали со нови автобуси и железница

Добивај вести на Viber

Обновата на возниот парк на ЈСП „Скопје“ и напредокот за подобрување на патната и железничката инфраструктура долж паневропски коридори 8 и 10 се главните проекти со кои министерот за транспорт и врски Миле Јанакиески се пофали денеска за време на средбата со генералниот секретар на Меѓународната унија за патен транспорт (ИРУ) Умберто де Прето.

Како што соопштија од министерскиот кабинет, Јанакиески пред високиот гостин ги презентирал активностите за изградбата на автопатот на потегот Демир Капија – Смоквица и проектите за ремонт на пругите долж Коридорот 10, како и рехабилитацијата на железничките станици и набавката на нови дизел и електромоторни гарнитури и вагони за потребите на железницата.

Од друга страна пак Де Прето ја истакнал стратешката позиција на Република Македонија во развојот на туризмот и трговијата, при што, како што стои во соопштението, нагласил дека клучно за нивниот развој е континуираното инвестирање во инфраструктурата. Според него влезот на Хрватска во Европската унија ќе има  позитивно влијание во транспортот, но Македонија не треба да биде свртена само кон земјите од Европа, туку да ги искористи можностите кои и се отвораат во развојот на транспортот кон источните земји посебно Блискиот Исток и Африка.

Како што се додава во соопштението од кабинетот на Јанакиески, генералниот секретар го поздравил начинот на кој во Република Македонија по електронски пат се врши распределбата на транспортни дозволи и изрази заинтересираност на следната распределба да испратат свој претставник кој ќе ја следи со цел претставување на истата како пример на добри практики,

Де Прето и утре останува во земјава во рамките на својата прва официјална посета откако стана нов генерален секретар на  најголемата транспортна асоцијација во светот (ИРУ), со седиште во Женева. Тој доаѓа по покана на СИЗ за патен транспорт Македонија сообраќај -АМЕРИТ.