Демонстрантите и полицијата се судрија пред бугарскиот Парламент

Добивај вести на Viber

Осум демонстранти и двајца полицајци се полесно повредени во синоќешните протести пред бугарскиот парламент, во кои, повеќе стотитици демонстранти се судрија со полицијата, спречувајќи ги пратениците да излезат од собранието, јави националното радио. Извикувајќи „Мафија“ и „Оставка“, противниците на Владата која ја водат социјалистите, фрлале пластични шишиња и други предмети врз добро обезбедуваниот автобус, со кој пратениците требало да заминат од Собранието, каде дебатираа за ребалансот на буџетот. По неколку обиди да го напуштат просторот околу Парламентот, автобусот ги врати пратениците во Собранието. Во раните утрински часови полицијата успеа да извлече од зградата на Парламентот тројца министри, пратеници, претставници на синдикатите и новинари. Во парламентарната зграда беа блокирани министерот за економија и енергетика Драгомир Стојнев, министерот за финансии Петар Чобанов и министерот за труд и социјална политика Хасан Адемов. Бугарскиот претседател Росен Плевнелиев апелираше синоќа за смирување на ситуацијата и избегнување на провокации. Демонстрантите синоќа, 40-ти ден по ред се собраа во центарот на Софија во знак на протест поради корупцијата и сиромаштијата, повикувајќи ја Владата на Пламен Орешарски предводена од социјалистите, да поднесе оставка.