Џеваир Холдинг: Сончев Град ќе биде најелитната населба на Балканот!

Добивај вести на Viber

За 1,8 милиони евра, турската компанија Џеваир Холдинг го купи земјиштето во Сопиште за изградба на елитната населба Сончев Град. Се уште не се откриваат детали како ќе изгледа проектот, но е јасно дека освен станбен дел, ќе има и трговски центри, болници, бензински пумпи и многу други содржини. Соња Јованова Наумовска За шест години Сончев Град треба да стане најелитната населба на Балканот. За тоа гарантира инвеститорот Џеваир Холдинг, кој како единствен понудувач на јавното наддавање, го купи земјиштето за безмалку два милиони евра. Претставникот на турската компанија, која веќе е актуелна со изградба на висококатниците во Аеродром, за Фактор, вели дека се задоволни од условите за работа во земјава и дека ќе продолжат со понатамошни инвестиции. „Ние дадовме понуда на јавното наддавање, сега чекаме и официјално да не известат дека сме избрани за најповолен понудувач. Инаку сметаме дека локацијата е одлична за изградба на една елитна населба, затоа и се пријавивме на тендерот, всушност ние веќе фативме работа во Македонија и нема да застанеме тука“, вели Ејуп Учак, претставник на Џеваир Холдинг во земјава. Според процедурата, во понеделник, општина Сопиште треба да ја извести компанијата дека се избрани за најповолен понудувач, по што инвеститорот треба да ги уплати сите пари на сметка на општината, по што ќе следи потпишување на договор за купопродажба на земјиштето. „После таа процедура Џеваир треба да уплатат и 3% данок на промет, по што следи солемнизација на договорот, па упис во Катастар и на крај инвеститорот мора да достави проект за да видиме како ќе изгледа Сончев Град“, објаснува градоначалникот на Сопиште Јован Ѓорѓијоски. Инвеститорот е условен проектот да содржи минимум 10% од она што го предвидела општината со урбанистички план. Најмногу индивидуални куќи или 51% од објектите треба да бидат куќи, а  помал дел или 9% да бидат станбени згради. Дотогаш, општината пак, мора да изгради пат, да донесе вода и струја до локацијата. Речиси сите се оптимисти дека овој пат ќе успее да се реализира долго најавуваниот проект за изградба на Сончев Град. По неколкуте неуспешни обиди, сега, градоначалникот се надева дека го нашле вистинскиот сериозен инвеститор, кој и покрај неколкуте најави за заинтересирани купувачи, остана единствен на јавното наддавање. Турската компанија Џеваир Холдинг покрај бизнис релациите, негува и пријателски односи со земјава, особено откако претседателот Ѓорѓе Иванов лично присуствуваше на свадбата на синот на Ибрахим Џеваир, сопственикот на Џеваир Холдинг. Ибрахим пак, на поставувањето камен темелник за изградба на висококатниците во Аеродром, покрај пофалбите, упати и неколку критики до Владата, тврдејќи дека треба да поработи на отстранување на пречките во законската регулатива кои се проблем за странските инвеститори. „Ја познавам компанијата, и знам што се имаат изградено и надвор од земјава. Тие се навистина заинтересирани за овој проект затоа што и пред да се објави тендер, доаѓаа  и тврдеа дека Сончев Град има предиспозиции да стане најелитната населба на Балканот“, додава Ѓорѓијоски.