Димитриев на средба со Жбогар ги прифати забелешките на Европската комисија

Добивај вести на Viber

Македонскиот премиер Емил Димитриев на средбата со евроамбасадарот на ЕУ Самуел Жбогар посочи дека земјата мора да ги прифати забелешките од Извештајот на Европската комисија за напредокот на Македонија во изминатата година и да ги искористи како насоки за развој во иднина.

- Европската агенда за Македонија останува врвен приоритет и на тоа силно ќе бидеме фокусирани во наредниот период. Укажувањата и забелешките кои се дел од Извештајот се нов патоказ за идните активности кои треба да ги направиме. Се надевам дека со одржувањето на изборите и формирањето на политичката влада ЕУ агендата повторно ќе дојде на дневен ред, како еден од највисоките приоритети, рече Димитриев по средбата со Жбогар, на која евроамбасадорот му го предаде Извештајот за напредокот на Република Македонија.

Додаде оти се надева дека новата влада ќе може со многу посилен фокус да се насочи на ЕУ агендата отколку што тоа било случај во изминатата година бидејќи, како што рече, таа беше година во која се соочувавме со исклучително големи политички предизвици, мигрантска криза, а Владата функционирала во облик на техничка за спроведување на изборите.

- Се надевам дека со реализација на последниот чекор од договорот меѓу политичките партии, а тоа е одржувањето на изборите ќе се создадат услови за поголемо внимание на итните реформски приоритети кои сметам дека Македонија прво ќе ја добилижат до ЕУ, а понатака и ќе ја внесат во Унијата, рече Димитриев.

И евроамбасадорот Жбогар го дели ставот дека Извештајот може да биде патоказ за институциите, за Парламентот и Владата по изборите и нејзините активности на европска агенда. 

- Овде сум повеќе од два, два и пол месеци и со кого и да зборувам во земјата со сите политичари, но и неполитички личности, мислам дека европската агенда е приоритет на сите. Затоа мислам дека таа е нешто што ги обединува сите политички лидери, политички сили, сите луѓе во земјата, истакна евроамбасадорот.

Токму затоа се надева дека изборите ќе се спроведат во најдобар ред и ќе продолжи процесот на реформи што ќе и го олесни патот на земјата кон Европската унија.