Додека СДСМ и Министерството се караат, патот Кочани-Делчево опасен по живот

Добивај вести на Viber

Не престануваат препукувањата на опозицијата и Министерството за транспорт.

СДСМ денеска од терен на патот Кочани-Делчево ја обвини власта за неисполнети ветувања.

„Проблематичната делница Кочани – Македонска Каменица со должина од 14км не е ниту почната а до август 2016 требаше да биде целосно реконструирана, вели Благој Бочварски од СДСМ.

Тој приложи документи со кои тврди дека на  30 август оваа година, “Македонија Пат“ од Министерството за финансии, бара нафтени деривати без надомест. (400.000 литри Еуродизел БС гориво и 400.000 литри Екстра лесно гориво). Барањето било одбиено под образложение дека ќе предизвика импликации врз Буџетот на Р.М. 

Бочварски потенцира дека „недостатокот на гориво е можеби само една причина зошто патиштата се во ваква состојба и зошто не се одржуваат“.

Надлежното Министерство се вади на обвинувањата со образложение дека извесен период се работи на санација на свлечиштето

„Министерството за транспорт и врски преку Јавното претпријатие за државни патишта веќе извесен период работат на санација на свлечиштето и реконструкција на регионалниот пат од Кочани до Делчево. Иако овој проект не беше предвиден во Програмата на Министерството за транспорт и врски, по барање на граѓаните од овој регион во месец мај годинава се започна со реконструкција на овој регионален пат во должина од 30 километри за што се одвоени вкупно шест милиони евра“, потенцираат во реакцијата на Министерството.

И додека вината си наоѓа изговори, граѓаните патуваат во страв

Карпата која падна на меѓународниот пат за Бугарија во поплавите во февруари, се уште се заканува и демне врз главите на патниците кои транзитираат за крајниот исток од државава или за Бугарија.

„Toa e најголемата опасност на овој пат, не знаеш што ќе падне додека возиш“, реагираат возачи. 

Велат дека овој пат со децении е ризик за нивните животи и досега безброј пати алармирале да се преземат безбедносни мерки за патот кој изгледа како од хорор филм.

Ова е втор голем одрон на делницата од Истибања кон М. Каменица, од лани од февруари стојат и одроните кои го направија меѓународниот пат еднонасочен.