Дотраените вагони ќе се менуваат со нови, ама билетите нема да поскапат

Добивај вести на Viber

Македонските граѓан ќе треба да се стрпат уште некоја година ако сакаат да се возат во нови вагони и со пристојна железница. Од Македонски железници најавија дека ќе го обноват возниот парк , а се надеваат дека ова ќе го зголеми превозот на патници и стоки.

Новите вагони ќе чинат 50 милиони евра, пари од Европската банка за обнова и развој. Од нив Македонски железници, ќе потрошат 15 милиони евра за товарните, 25 милиони евра за патничките како и 10 милиони евра за поправка на старите вагони.

Јавниот повик за набавка на нови 150 товарни вагони веќе е објавен, а за патничките ќе биде објавен во август. До 10 септември треба да бидат доставени понудите за товарните вагони кои се очекува да бидат доставени во текот на следната година.

„Со овој чекор Македонски железници - Транспорт ќе го зголеми возниот парк и ќе ја зголеми можноста за превоз на поголеми количини стока“, истакна министерот за транспорт и врски Миле Јанакиески кој појасни дека ќе има два типа на вагони, за производи од металната индустрија и за транспорт на руда и јаглен

Според најавите, новите вагони, нема да ги поскапат билетите за превоз на патници.

Вчера пак, надлежните најавија реновирање и на железничките пруги во централна Македонија, каде што до година, наместо со 50, возовите ќе почнат да се движат со 100 километри на час.