ДУИ НЕ ПОПУШТА - останува на ставот дека сите административци не треба да одат на „минималец“
Објавено во: Македонија 17 Април, 2020
Владиниот партнер ДУИ и натаму стои на ставот дека целата јавна администрација не треба да оди на минималец од 14.500 денари.
„Ако зборувам како претставник на ДУИ, таа е конзистентна во нејзината политика, и носи одлуки врз база на направени детални анализи од аспект и на приходите, и на расходите на буџетот. Што се однесува до кратењето на јавната администрација, ние се уште стоиме на ставот дека во моментов не треба да се направи такво кратење, а секако не треба да се направи кратење во целата јавна администрација, по првичниот предлог за сите да одат на минимална плата“, рече министерот од ДУИ, Крешник Бектеши.
Веќе усвоивме како Влада, додава, и прераспределба на буџетот или мини ребаланс.
„Во зависност како ќе се наплатуваат приходите во април и во мај, секако дека ќе се донесат соодветни одлуки, се со цел буџетот да биде ликвиден, но и државата да биде во можност да ги плати и пензиите и социјалните трансфери, но и платите во јавната администрација, но притоа да продолжи само со продуктивните проекти, и капитални и други што ќе дадат позитивни ефекти“, рече Бектеши.