Два милиони Израелци ќе останат без своите ковид сертификати
Објавено во: Свет, Корона Вирус 03 Октомври, 2021
Израелските власти од денеска имаат нови анти ковид мерки. Во Израел скоро два милиони граѓани остануваат без ковид-пропусница затоа што не примиле и трета доза од вакцината против коронавирусот. Без нив не можат да одат на настани или да посетуваат музеи.
Во земјата има нови правила. Ковид-пропусницата од денеска важи само шест месеци по примената последна доза. Досегашните сертификати повеќе не важат и граѓаните треба да извадат нови преку веб-страницата на израелското Министерство за здравство или преку апликациите кои им се достапни од синоќа на полноќ. Граѓаните кои прележале ковид-19, за да добијат пропусница треба да прима една доза вакцина. За нив, сертификатот ќе биде валиден една недела од примањето на вакцината, а ќе истекува шест месеци по вакцинирањето. Пропусници ќе добиваат и децата до 12 години, но ќе треба да имаат негативен ПЦР тест. Израелските власти овозможија и издавање на привремени пропусници врз основа на негативен тест. На 1 август Израел почна со кампања за примање „бустер“ доза, првично за оние над 60 години, но сега трета доза е достапна за сите граѓани постари од 12 години. За да се добие трета доза, потребно е да поминат шест месеци од ревакцината. Израел беше земја со висока стапка на имунизирано население, но бројот на заболени енормно скокна.