Добивај вести на Viber
Скопски „Бетон“ и фирмата „Турбоинжинеринг“, исто така од Скопје, се единствените две фирми заинтересирани да ја довршат изградбата на Милениумскиот крст, на тендерот што го распиша ЈСП Скопје.
Понудата на скопски „Бетон“ е пониска - 69 милиони денари или 1,1 милиони евра, додека „Турбоинжинеринг“ за работите бара 74 милиони денари или 1,2 милиони евра. Но и двете понуди се речиси двојно повисоки од парите што ЈСП Скопје имаше намера да ги потроши за оваа намена.
Тендерот за доизградба на овој објект ЈСП го распиша во декември откако претходно од Градот Скопје го презеде правото за стопанисување со Милениумскиот крст. Тендерот на два пати беше и продолжуван, на барање на фирмите заинтересирани за учество.
Комисија сега треба да ги разгледа понудите, а конечниот избор ќе биде направен за една недела. Според условите, избраниот изведувач има девет месеци за да го заврши целосното уредување на Милениумскиот крст, но од ЈСП очекуваат тоа да се направи и порано.
Фирмата ќе треба да изврши антикорозивна заштита на објектот, да го замени лифтот во Милениумскиот крст, да спроведе вода и одвод, да изгради пречистителна станица и да го осветли просторот околу објектот. Светилките од двете страни на крстот ќе се менуваат со штедливи, а за вода ќе се копа бунар длабок околу 40 метри.
Финансирањето на овој проект ќе се покрие со донации.