Еден од противпожарните авиони е во Шпанија, другите два чекаат ред за сервис
Објавено во: Македонија 06 Февруари, 2022
Дирекцијата за заштита и спасување ја започна новата 2022 година со непоправени противпожарни авиони. Иако договорот со шпанската компанија „Titan Firefighting Company S.L. беше потпишан лани во октомври, оттогаш до сега не е поправен ниту еден противпожарен авион. Еден од нив моментално се сервисира во Шпанија. Дирекцијата располага со три такви авиони, но ниту еден од нив не е моментално во функција, пишува Алсат.
„Процесот на поправка започна, еден од авионите е во Шпанија додека за другите два има динамичен план. Првиот авион е веќе таму и според сите проценки ќе се врати на крајот на февруари и ќе биде функционален за гаснење пожари“, соопшти Дирекцијата за заштитаа и спасување.
Сервисирањето на авионите ќе се врши во фази. За еден авион поправката ќе трае до 60 дена, по што ќе биде испорачан другиот. Ако првиот авион заврши во февруари, тогаш последниот авион треба да биде готов во јуни.
Договорот со „Титан“ за поправка на три летала чини 400 илјади евра. Покрај овие средства, државата платила и над 265 илјади евра за осигурителни компании бидејќи за да се поправат авионите мора да бидат осигурани. Во тек е постапката за набавка на керозин во вредност од 40 илјади евра. Конечната цена за авионите што ќе бидат пуштени во употреба ќе достигне и до над 700 илјади евра. Иако ова се високи суми, мора да се земе предвид клучната улога на авионите за гаснење пожари. Минатата година за време на големите пожари, тие беа приземјени додека државата мораше да побара помош однадвор.