Eдна европска партија го критикува Макрон и бара датум за Македонија
Објавено во: Македонија 04 Јули, 2019
Европските Зелени излегоа со остра критика за изјавите на францускиот претседател, Емануел Макрон за проширувањето не Европската Унија.
Партијата на Европските Зелени, по повод Самитот за Западен Балкан кој се одржува во Познањ, во рамките на Берлинскиот процес, побара во најкус можен рок да започнат преговорите за членство со Северна Македонија и Албанија.
Според нив, Европската Унија ризикува да предизвика повторно оживување на национализмот на Западниот Балкан ако го забави процесот на отворање на вратите за пристапни преговори за регионот.
„Коментарите на францускиот претседател Емануел Макрон неодамна за перспективите за проширувањето длабоко одмагаат и ја поткопуваат тешката задача на постигнување консензус“, стои во соопштението на Европските Зелени.
Тие потсетуваат дека е втор пат да се одложат преговорите и покрај препораката на Европската Комисија.
За Зелените е од суштинско значење министрите овие денови во Познањ да ги имаат предвид напорите кои ги вложи Северна Македонија за решавање на спорот со Грција за името.