Еко налепници ќе има, дали и забрани за движење?
Објавено во: Македонија 29 Јануари, 2018
Надлежните власти наголемо ги подготвуваат законските измени со кои ќе овозможи поставување на еко-налепници на возилата во Македонија кои ќе бидат индикатор за тоа колку загадуваат согласно горивото и моторот со кои располагаат, но вистинското прашање е на кој начин ќе се воведат забрани и ограничување на движењето на овие автомобили.
Еколошките налепници во Скопје ќе се однесуваат на движењето на возилата во денови кога ќе биде екстремно загадено, а ќе бидат уредени со измени и дополнувања на Законот за животна средина.
Во законот треба да се вградат нови одредби со кои ќе бидат утврдени формата и дизајнот, набавката, контролата, дистрибуцијата, глоби и инспекцијата.
Со законот ќе биде уредено и тоа како ќе се категоризираат возилата, односно возилото во станиците за технички преглед зависно од тоа кој ЕУРО стандард го исполнува ќе добие еколошка налепница со црвена, портокалова или зелена боја.
Општините во кои има загадување на воздухот од возилата ќе треба да изработат и донесат прописи согласно Законот за локалната самоуправа со кој ќе се воведе режим на сообраќај - зонирање, како и поставување сообраќајни знаци за ограничување на заштитената еколошка зона во општините, односно да воведат забрана на движење на возилата со црвена еколошка налепница.