Економијата во Аргентина опаѓа, Претседателот тера политика

Аргентинскиот претседател Кристина Кирхнер ги користи Фокландските острови и покренувањето на „случајот со суверенитетот“, само за да ги прикрие состојбите во домашната економија и заканата од нова, длабока економско-финансиска криза во земјата, пишува „Дејли телеграф“.

Ваквите обвинувања доаѓаат по последните масовни демонстрации во аргентинскиот главен град против политиката на претседателката Кирхнер и актуелната криза во земјата, на кои учествувале над 200.000 луѓе. Некои од демонстрантите носеле транспаренти на кои Кирхнер се повикувала наместо со Фокландите, да се занимава со влошените економски прилики, инфлацијата и криминалот во Аргентина.

Само за една година, економскиот раст во земјата е намален за повеќе од 50 %, а инфлацијата достигна до 24 % и е најголема во Јужна Америка. Независни економски експерти во Буенос Ајрес за лондонскиот весник тврдат дека ситуацијата во земјата е полоша, отколку што официјално се прикажува, а економскиот раст годинава ќе падне на 1,5%, во споредба со преку осум проценти лани. Домашната опозиција ја обвинува Кирхнер за „популизам“ и за „залажување на масите“, додека нејзниното перонистичко движење се соочува со внатрешни расправии и поделби. Опозицијата ја критикува за нејзината се поголема блискост со венецуелскиот претседател Хуго Чавез и за се поголем авторитатизам во водењето на земјата, како и за непотребни кавги и расправии на меѓународната сцена. Нејзината расправија со генералниот директор на ММФ Кристин Легард, се оценува како контрапродуктивна, а покренувањето на прашањето за Фокландските (Малвинските) острови како целосно неполезно. Рејтингот на Кирхнер кој во 2011 година изнесуваше 40 %, сега е намален на 24 %, но аргентинскиот претседател не сака да се повлече од функцијата на крајот на нејзиниот втор мандат, во 2015 година. Според „Дејли телеграф“, покрената е иницијатива за промена на Уставот и за укинување на одредбата за огранчување на претседателскиот мандат, па се најавува дека таа ќе се кандидара и по трет пат.