Добивај вести на Viber
Сите економски промотори и амбасади се вклучени во анимирање на компаниите - потенцијални инвеститори во проектот за гасификација на скопскиот регион, изјави министерот за транспорт и врски Миле Јанакиески. Тој денеска проектот го презентираше и пред македонските бизнисмени.
Јанакиески вели дека веќе има многу заинтересирани компаниии, од европските земји, но и надвор од ЕУ, а за пример ја посочи Турција.
„Се уште е рано да очекуваме поднесување на документација бидејќи тоа треба да се случи во мај. Има голем интерес. Очекувам дека ќе има поголем број компании кои ќе достават апликации за да се квалификуваат во вториот круг што би значело најголем дел од нив да дадат финансиска понуда“, рече министерот.
Скопскиот регион ќе биде првиот од планираните три региони во државата кој ќе се гасифицира. Избраната компанија, која ќе добие концесија од 20 години за гасоводната мрежа, треба да изгради најмалку 70% односно 175 километри од потребната мрежа за гасифицирање. Изградбата на гасоводната мрежа ќе чини околу 100 милиони евра и ќе се гради по принцип на јавно приватно партнерство.