Екс член на ОНА и поддржувач на Ахмети доби четиринаесетто продолжување на пробна лиценца за мала хидроцентрала: Добивката му паѓа од година во година

Добивај вести на Viber

„Ани-Енергетик“ од Тетово, во која мнозински сопственик е Нури Беџети, професор на универзитетот во Тетово, поранешен член на ОНА и поддржувач на политиките на Али Ахмети и ДУИ, повторно доби пробна лиценца за малата хидроцентрала на Габровска река.

Во фирмата, освен професорот кој е на црната листа на САД, Беџети кој има 59 проценти, сопственик со 6 отсто е и „АК-Инвест“, една од фирмите подизведувачи на „Бехтел и Енка“ за делницата Гостивар-Букојчани, но и фирма која е меѓу оние кои добивале најмногу пари од тендери за градежни работи, а со 35 проценти, ко-сопственик е и фирмата за градежништво и проектирање, „Цеацон“, исто така од Тетово.

Фирмата низ годините има се помала добивка. Ако во 2022 година имале 622 илјади евра, во 2023 година, таа се намалила на 161 илјада, за минатата година, „Ани-Енергетик“ да има добивка од речиси 120 илјади евра.

Фирмата прв пат добила пробна лиценца за хидроцентралата од 1,24 мегавати во 2021 од страна на Регулаторната комисија за енергетика. Иако ова е четиринаесетто продолжување на пробната лиценца, фирмата се уште не добива трајна лиценца.

Во Одлуката е наведено дека „Ани-Енергетик“ има доставено и барање за продолжување на рокот за комерцијална работа за малата хидроелектрична централа „Габровска река“. На 31 јули пак, било утврдено и дека има застој во постапките кои ги води оваа фирма за „Габровска река“, па било предложено продолжување на рокот за почеток на комерцијална работа за „Габровска река“ до 7 октомври 2025 година.

Фактор претходно пишуваше дека Владата на седница на 3 јуни годинава донела одлука на Ани-Енергетик да му даде државно градежно земјиште под долготраен закуп по пат на непосредна спогодба за потребите на хидроцентралата во тетовско Доброште.