ЕЛЕМ не може да најде консултант за докапитализација!

Добивај вести на Viber

Електрани на Македонија веќе една година бараат консултант во постапката за докапитализација кој има искуство во издавање акции и кој ќе понуди оптимален модел за докапитализација на државната компанија до 49%. Последниот оглас за избор на консултант заврши неуспешно! Државните Електрани безмалку една година бараат консултант кој ќе им дава совети за процесот на докапитализацијата на компанијата. Иако во август минатата година ЕЛЕМ распиша оглас за избор на консултант, кон крајот на минатиот месец компанијата ја поништи постапката. “Државните Електрани на Македонија не можат да извршат избор на најповолна понуда поради битни повреди на Законот за јавните набавки“, е кусото образложение за причините за поништувањето на постапката за избор на консултант кое го нуди Електронскиот систем за јавните набавки. Фактор неофицијално дознава дека на огласот иако се јавиле помалку од 10 консултанстки куќи, сепак ниту една од нив не ги исполнила условите за ЕЛЕМ да склучи договор со некоја од нив. Од ЕЛЕМ за Фактор објаснуваат дека и покрај неуспехот за изнаоѓање Меѓународен консултант за процесот на докапитализација на компанијата, не се откажуваат од идејата да најдат реномиран консултант кој има искуство во вакви процеси. Оттаму додаваат дека најверојатно наскоро ќе ја повторат постапката и одново ќе распишат меѓународен оглас. Според огласот на ЕЛЕМ, понудите на потенцијалните консултанти за процесот на докапитализација на ЕЛЕМ ќе се бодуваат со 70 поени за квалитет на понудата, 25 поени за награда за успешно завршена трансакција и 5 поени за цената на набавката. За да ја подигнат тендерската документација, консултантските куќи требало да платат по 100 евра. Ако се земе предвид дека помалку од 10 компании подигнале тендерска документација, најверојатно на сметката на ЕЛЕМ за по овој основ легнале помалку од 1.000 евра?! Што бара ЕЛЕМ од идниот консултант? Целта на докапитализацијата е да се обезбедат дополнителни вложувања во енергетиката. Идниот консултант ќе треба да сугерира кои енергетски проекти се приоритетни за ЕЛЕМ, но и за инвеститорот, кој ќе ја докапитализира компанијата. Консултант ќе се бара од редовите на меѓународните консултанти или инвестициски банки. Влез на приватен капитал во државните електрани се најавува уште од крајот на 2011 година. Планирано е привлекување на странски капитал, којшто би инвестирал во делови што се приоритетни за ЕЛЕМ и со тоа би ја зголемил капиталната вредност на компанијата, а на тој начин оној што би ги инвестирал тие пари би добил дел од целокупното капитално портфолио на компанијата.

“Докапитализација значи зголемување на капиталната вредност на компанијата, а не продажба. На пример, со изградбата на Бошков мост вредноста на ЕЛЕМ ќе порасне. Тоа е еден вид докапитализација. Она што КПМГ го работи во Македонија за ЕЛЕМ е всушност проценка на вредноста на имотот на компанијата. Постојат неколку вредности на одредена компанија, на пример: со колку имот располага, потоа т.н. заменска вредност – колку пари се потребни за да ја замените таа компанија во дејноста во која работи и третата вредност е колку компанијата вреди на пазарот. Но, во делот на докапитализација не станува збор за ниту една од споменатите вредности. Нашиот модел е да најдеме партнер кој е подготвен да инвестира во ЕЛЕМ и на тој начин да стекне акции. Ако, на пример, вредноста на ЕЛЕМ е една милијарда евра, во тој случај за некој да добие 49% од акциите ќе треба да внесе уште една милијарда евра. Тогаш ЕЛЕМ ќе вреди две милијарди евра. Така инвеститорот ќе има 49% од капиталот на компанијата, а државата 51%. Можностите за тоа се различни. За да се реализира нешто такво, прв и основен чекор е да знаеме колкав е капиталот со кој располага ЕЛЕМ. Следниот чекор е да се избере странски консултант кој има искуство во издавање акции и барање стратегиски партнери со задача на тој консултант да изнајде оптимален модел за докапитализација на ЕЛЕМ, односно на кој начин да се дојде до дополнителни вложувања, односно инвестирања во компанијата“, изјави во јавноста поранешниот директор на ЕЛЕМ; Влатко Чингоски минатата година, објаснувајќи што всушност ќе значи докапитализацијата за државниот производител на струја.

К.П