Ердоган по победата: „Победија и Сараево и Скопје!“

Добивај вести на Viber

Досегашниот турски премиер и победник на вчерашните први директни претседателски избори во Турција Реџеп Тајип Ердоган, во победничкиот говор на прославата за изборните резултати, нагласи дека со неговиот избор, освен Турција, победиле и Бејрут, Кабул, Сараево и Скопје. „Денеска не победи само Реџеп Тајип Ердоган. Победи волјата на народот. Демократијата повторно победи. Денеска победија оние кои ме ценат, но и оние кои не ме ценат. Денеска победи нова Турција, лидерска, напредна Турција. Но, не само Турција, денеска победија Кабул, Бејрут, Сараево и Скопје. Денеска победија Дамаск, Рамалах, Газа и Ерусалим“, рече Ердоган, според кого неговата изборна победа значи победа за сите пријатели на неговиот народ во целиот свет. „На сите им испраќаме поздрави, на сите кои не поддржаа на каков било начин“, додаде тој. Истовремено, им се заблагодари на турските гласачи кои му ја дале добвербата за нова функција. Турскиот претседател извојува победа во првиот круг од претседателските избори, надминувајќи го потребниот праг од 50% плу еден глас. Во своите говори тој честопати ја споменува поддршката која ја добива од Македонија. Претседателот на Европскиот совет Херман ван Ромпуј и претседателот на Европската комисија во заминување Жозе Мануел Баросо утрово му ја честитаа изборната победа на Ердоган за претседателската функција. „Турција е клучен партнер на Европската унија, земја-кандидат која преговара со ЕУ за членство, сосед, важен трговски партнер и надворешнополитички сојузник“, стои во соопштението од Брисел. Двајцата високи европски претставници истакнале дека се радуваат на интензивирање на соработката во сите наведени подрачја. Ромпуј и Баросо додале дека веруваат оти Ердоган ќе има улога на помирување, каква што бара неговата нова позиција и дека ќе води сметка за сите заедници, верници, чувства, мислења и за начинот на живот во турското општество.