Европски град го забранува просењето, ќе се казнуваат минувачите кои даваат пари
Објавено во: Економија, Свет 22 Март, 2016
Европски град одлучи со проблемот на просјаците да се избори на свој начин - наместо да ги казнува просјаците, властите планираат да воведат парични казни за минувачите кои им даваат пари.
Таа одлука е објавена откако жителите на италијанскиот приморскиот град Бордигера во регионот Лигурија, изнеле жалби дека локалните просјаци не ги оставаат на мир, пренесува „Раша тудеј“.
- Бесмислено е да ги казнувате оние кои не можат или никогаш нема да можат да платат казни - рекол градоначалникот Џакомо Паланка. Тој за локалниот весник „Секоло ХIХ“ рекол дека таа појава мора да се искорени бидејќи, како што истакнал, зад неа често се кријат вистински организации, а најдобар начин тоа да се направи е да се обесхрабрат оние кои на просјаците им даваат пари.
Иако просјачењето и понатаму е легално на национално ниво во Италија, некои тамошни градови имаат сопствени прописи кога станува збор за тоа, па така Венеција во 2008 година забрани просјачење и воведе казни од 25 до 35 евра за оние кои нема да ја почитувааат забраната.
Просјачењето, исто така, е збрането во Шведска и Англија, како и во некои региони во Норвешка и Австрија, додека во Грција се казнува со шест месеци затвор.