„Евростат“: Бугарите се најнезадоволни од животот во Европа!
Објавено во: Анализа 20 Март, 2015
Бугарите биле најмалку задоволни од животот во 2013 година во Европа покажуваат истражувањата на „Евростат“ во врска со Светскиот ден на среќата, кој се одбележува денеска.
При направената анкета од европската статистичка служба било зададено следново прашање: „Колку сте задоволни од вашиот живот во последните денови?“.
Скалата на оценување е од 0 („не сум задоволен“) до 10 („целосно сум задоволен“). За речиси 80% од Европејците просечната оценка е 6 и нагоре.
Најзадоволни од животот се во Данска, Финска и Шведска, каде оценката е во просек 8,0.
Бугарите се најнезадоволни од животот - во просек 4,8 оценка. До Бугарија се Грција, Кипар, Унгарија и Португалија (6,2).
Според возрасни групи во Бугарија оценките се следниве: помеѓу 16 и 24 години - 5,8; меѓу 25 и 34 - 5,4; меѓу 35 и 49 - 4,9; меѓу 50 и 64 - 4,6; меѓу 65 и 74 - 4,3 и над 75 година - 3,8.
Здравствената состојба се наведува како главен фактор за задоволството во животот, а потоа се финансиската ситуација, работното место и социјалните односи.
Младите граѓани на ЕУ изгледа се најзадоволни од својот живот - 7,6 / 10 меѓу 16-24-годишниците.
Македонија не се најде на оваа листа, како и Црна Гора и БиХ.
