ФАКТОР ДОЗНАВА: Оние 780 штедачи во Еуростандард банка имале вкупни заштеди од 25 милиони евра

Добивај вести на Viber

Кога беше објавено дека се укинува дозволата за работење на Еуростандард банка, надлежните соопштија и дека во банката има над 130 илјади штедачи, кои главно ќе бидат обесштетени преку Фондот за осигурување на депозити, односно во таа група ќе влезат сите оние кои имале штедни влогови до 30 илјади евра, а кои согласно законите, треба да бидат целосно намирени. 

Но, како што беше информирана јавноста, има и 780 штедачи, кои поради тоа што имаат повисоки суми на поединечни штедни влогови, ќе добијат обесштетување до 30 илјади евра, а остатокот ќе треба да го побаруваат и да го очекуваат од стечајната маса. 

Според неофицијалните сознанија на Фактор, овие 780 штедачи во банката имаат вкупна сума на заштеди во банката од 25 милиони евра.

Кои се тие штедачи и колкави поединечни суми чувале во банката, не се знае и тоа не може да се открие.

Ако се бара, пак, просек, овие штедачи во просек имале по 32 илјади евра, што се добива ако се подели 25 милиони евра со 780 штедачи. Тоа не е многу повисоко од законската сума за обесштетување. Но, ова е просек, а не значи дека сите штедачи чувале исто пари.

И овие штедачи ќе добијат од Фондот по 30 илјади евра, што значи дека не се оштетени за големи суми на пари, кои ќе ги побаруваат од стечајната маса на банката.

На тоа оди во прилог и податокот кој надлежните го соопштија уште првиот ден, а тоа е дека 99,4 отсто од штедачите ќе бидат исплатени од Фондот за осигурување. 

Кога ќе се видат книгите на Еуростандард банка од страна на стечајниот управник, можеби ќе се дознае колкави суми на штедни влогови имале поединечните штедачи.

Сепак, од ова произлегува дека не било возможно да имало штедач кој во банката чувал 7 милиони евра, како што проструи информација во јавноста.

А Фактор пишуваше дека за 11-те банки и штедилници кои досега пропаднаа, Фондот за осигурување депозити од 1997 година па заклучно со првата половина на минатата година, потрошил 22,3 милиони евра, од кои најмногу пари отишле за штедачите на Македонска банка, или 18,9 милиони евра. 

Дел од овие штедачи, и по долги години, се уште не дошле да си ги земат парите, делумно и заради тоа што имале мали влогови, па тие за нив не биле атрактивни за да ја тераат постапката за обесштетување. 

Ако се имаат предвид сознанијата дека во Еуростандард банка имало депозити од 71,5 милиони евра, вкупната сума за обесштетување што ќе се исплати сигурно ќе биде повисока од досегашните банки. 

Н.Н.Ф.