ФАЛАТ ЗАНАЕТЧИИ: Ќе немаме кој да ни поправи бојлер или електрична инсталација

Добивај вести на Viber

Имаме недостиг од сите занаети, но најмногу од завршните занаетчиски дејности во градежништвото (водоводџии, паркетари, плочкари, молери, столари), сервисери на апарати за домаќинство, електричари, електроинсталатери, ѕидари, кровопокривари, бравари, заварувачи, оџачари, вели Снежана Денковска, директорка на Занаетчиската комора.

Ќе дојде ден кога занаетчијата ќе биде поплатен од многу други професии, сметаат оттаму. 

„Поради недостиг на занаетчии, цените на занаетчиските услуги ќе растат и за кратко време ако не се превземат мерки за стимулирање на занаетчиството и спречување на сивата економија ќе немаме кој да ни поправи бојлер или да ни направи поправка на електрична инсталација. Генерално недостаток на занаетчии има во цела Македонија, потребно е да се подигне имиџот на средното стручно образование и занаетчиството за да младите гледаат перспектива во стручното образование и занаетчиските бизниси и можност за градење кариера“, вели Денковска.

Но, нагласува дека преку средното образование може да се делува за младите да имаат интерес за занаети.

„Како што споменав намалениот имиџ на средното стручно образование и воопшто занаетчиството и неквалитетното средното стручно образование кое не може да разбере дека учениците се производ за пазарот на труд и не може да добие диплома која не одговара на нивното применливо знаење, немаат вештини и немаат компетенции.  Мора да се воведе дуален систем на образование и учениците да одат на практична обука кај работодавачите во текот на наставата и за време на распустот (феријална пракса) за да по завршувањето бидат спремни да се вклучат во процесот на работа. Мора да се поддржат финансиски работодавачите за да се стимулираат да примаат ученици на пракса, чираци и практиканти, но мора да имаат даночни и царински олеснувања, но и друга финансиска поддршка. Занаетчиството недоволно е поддржано и од Владата на РМ и од локалната самоуправа“, смета Денковска.

Состојбата е слична и во регионот. Потребни се занаетчии и поради тоа оние кои имаат вакви знаења и вештини можат да дојдат до добра заработка.