„Фершпед“ бележи загуба, „Макошпед“ добивка во првото тримесечје од годината

Добивај вести на Viber

Групацијата  „Фершпед“ реализираше нето загуба од над 45 милиони денари во првото тримесечје, додека „Макошпед“ за истиот период оствари добивка од 151.000 денари, покажуваат билансите на успех на компаниите, објавени на Македонска берза. „Фершпед“ во период од јануари до март оваа година оствари негативен финансиски резултат, додека консолидираните продажби за периодот бележат пораст од 14 отсто во однос на остварени продажби во истиот период лани. Оперативните приходи, како што се наведува во Образложението, бележат раст од 16 отсто, но растот на оперативните расходи е поголем за еден индексен поен од порастот на оперативните приходи за оттаму и загубата да биде 45.467.000 денари. За истиот пресметковен период, компанијата „Макошпед“ остварила вкупни приходи од 17.208.000 денари, од кои 16.696.000 на домашен, а само 388.000 на странски пазар, стои во Билансот на успех на компанијата, објавен на Македонска берза. Според образложението на компанијата, добивката од 151.000 денари е помала во споредба со истиот период лани, а потекнува од намалените приходи на странските пазари и намалените приходи од камати.