Фијат Цаноски: На ден пред Илинден ми го сруши Космос, а денес закажува борба со камења преку Дунав

Добивај вести на Viber

Бизнисменот Фијат Цаноски, по неколкуте статуси на Фејсбук на поранешниот премиер Никола Груевски за кратко време, му одговори на бегалецот во Унгарија дека само „закажува фер борба на 100 метри со камења преку Дунав“. Сопственикот на урнатиот „Космос“ се присетува дека на денешен ден му била урната неговата инвестиција. Груевски во моментов се води како политички азилант во Унгарија.

„На ден пред Илинден, со динамит Груевски објави диктатура. Можеби понесен од револуционерни побуди или пак од себични нагони на самоуништување - сеедно. На денешен ден пред 8 години се правеше маж, динамитен десничарски демократ. Денес е маж кој ја напушти земјата која ја опустоши. Денес закажува фер борба само на 100 метри со камења - преку Дунав. Користењето на emoji во толкав обем говори само за еден нарцисоиден плачко кој не е подготвен да се соочи со резултатите од своите не/дела.“, напиша Цаноски на својот профил на Фејсбук.

Додаде дека „Космос“ повторно ќе биде изграден, а за Груевски порача дека е „трагедија од човек чие дело не треба да се заборави во историјата“.

- Да не се заборави. Не само уништувањето на Космос туку и уништувањето на мојата земја, чиишто вредности ги обезвредни до степен на болест. 
Добро е што Космос повторно ќе блесне во сјајот кој му е предодреден. И повторно ќе биде нова општествена додадена вредност. Северна Македонија ќе оди напред. Но, да не се заборави историјата на нашава напатена земја и трагедијата од човек наречен Никола Груевски, за никогаш да не се повтори. Да одиме напред, да е честит Илинден и да живее Северна Македонија!, додава Цаноски.