ФИЛИПЧЕ ДЕЦИДЕН: Инспекторатот ќе казнува за невакцинираните деца

Добивај вести на Viber

Со глоби ќе се соочат родителите чии деца не се вакцинирани односно не ја испочитувале одлуката на надлежните во однос на имунизацијата и заштитата од морбилите .

Првиот човек на здравството децидно вели дека нема повлекување од одлуката и најави засилени контроли од здравствениот инспекторат во училиштата.

Засега бројот на заболени од морбили стагнира и покрај информациите во дел од медиумите дека неколку училишта примале деца кои не се ваквинирани.

Неколку дена пред стартот на новата учебна година основните училишта ги потсетуваа родителите до крајот на месец август да достават потврда дека детето ги има примано сите вакцини. Доколку родителот, не доставил до 31 август уредно пополнет вакцинален картон, детето нема да биде запишано на училиште, иако во месецот кога се запишуваа првачињата нивните документи биле примени.

Министерството за здравство во соработка со министерството за образование во екот на епидемијата со морбили воведе и агресивни мерки за теренска вакцинација на учениците во училиштата. И покрај оваа мерка и редовните апели на здравствените работници да се вакцинираат децата со МРП вакцина како најдобра заштита од морбили, според податоците на Институтот за Јавно здравје околу 8000 деца немаат примано МРП вакцина во земјава.

Стапката на вакцинација во целата држава на крајот на август изнесуваше 98%. Во Скопје беше 99%, а во останатиот дел од државата 97%, со што всушност е исполнета препораката на Светската здравствена организација.