Филомена Пљаковска Аспровска, главна извршна директорка и претседателка на Управниот одбор на КаСис: „ Безбедноста е, и ќе остане наш највисок приоритет!“

Добивај вести на Viber

На конференцијата The Economist MeetUp Светот во 2025 која се одржа минатата недела беа дискутирани револуционерните промени кои го обликуваат модерното финансиско опкружување. На панелот „Иновации во финансискиот сектор: Од нови технологии до инвестициски трендови“ говореше и Филомена Пљаковска Аспровска, главната извршна директорка и претседателка на Управниот одбор на КаСис, која осврнувајќи се на годината која изминува изјави:

„Се радувам што по години посветена работа, нашата компанија денес е синоним за иновација. 2024 година е најуспешната досега, со многу нови и интересни проекти кои ја задржуваат вниманието на јавноста. Еден од нашите значајни чекори е започнувањето на сертификација за „American Express“, со што стануваме еден од ретките процесори што поддржуваат четири картични системи“.

Во ера на брза дигитална трансформација, иновациите во е-трговијата играат клучна улога во олеснување на процесите за бизнисите и корисниците,а компаниите се стремат кон постојано подобрувањена корисничкото искуство и проширување на можностите за дигитални плаќања.

„Системот за е-трговија на КаСис е во постојан раст, со воведување на нови функционалности. Плаќањето со линк е иновација што им овозможува на бизнисите без сопствени веб-страници да вршат електронски плаќања. Дополнително, развиваме апликација за плаќање преку мобилен телефон, која ќе го олесни прифаќањето на плаќања за корисниците“, истакна Филомена Пљаковска Аспровска.

За предизвиците и можностите што ги носат иновациите за финансиските институции и пазарите, како и новите технологии што го редефинираат пристапот кон управувањето со средства и финансирање, акцентот според Пљаковска Аспровска е на одржливоста и довербата во новите модели.

„Во 2025 година, нашиот главен фокус ќе биде на безбедноста. Со оглед на зголемените малициозни напади, потребно е да одржуваме исто темпо во унапредувањето на безбедносните мерки, бидејќи безбедноста е и ќе остане наш највисок приоритет.“

На панелот Иновации во финансискиот сектор: Од нови технологии до инвестициски трендови powered by New Biz Podcast покрај Филомена Пљаковска Аспровска, говореа и Тони Јанковски, директор за развој и иновации во Diners Македонија и Иван Ивановски, претприемач и инвестициски консултант, а модератор беше Наташа Велковска, директор за ПР и контент продукција во Represent Communications Macedonia.