ФОКУС НА ДЕНОТ: Maкедонија слави 28 години независност, политичарите со различни пораки

Добивај вести на Viber

На 8 септември 1991 година во Република Македонија се одржа успешен референдум по кој беше прогласена независна Република Македонија, која дотогаш беше во рамките на СФРЈ.

На референдумот граѓаните се изјаснуваа на прашањето: Дали сте за самостојна Македонија со право да стапи во иден сојуз на суверени држави на Југославија. Учествува 1,2 милиони Македонци и други граѓани на Македонија, а според резултатите кои беа објавени речиси стопроцентно беше поддржана самостојноста на Македонија.

Според конечните, официјални резултати од 1.495.626 гласачи, на Референдумот излегоа 1.021.880 или 71,85 проценти од граѓаните со право на глас. Од нив 95,09 отсто гласаа ЗА самостојна и независна македонска држава.

Текот на Референдумот го следеа 167 домашни и 100 странски акредитирани новинари. Референдумот во Македонија се одржа во предвечерјето на распадот на СФРЈ, по дефинитивното изјаснување на Словенија и Хрватска дека се определуваат за независност и самостојност. Во Македонија беше спроведено предреферендумска кампања, а на 2 септември беше објавен заеднички проглас на парламентарните и вонпарламентарните партии со кои граѓаните беа повикани масовно да излезат и да се изјаснат ЗА на Референдумот.

Премиерот Зоран Заев денеска на прославата по повод Денот на независноста 8-ми Септември во градскиот парк, порача дека Maкедонија се стреми кон членство во НАТО и ЕУ. 

Вели дека создаваат држава со сосема извесна европска иднина. 

Заев кажа дека донеле големи одлуки и направиле вистински избори. 

Премиерот се заблагодари на сите народи кои покажале разбирање. 

„Овие мостови кои ги градиме денес се крвотокот на нашата доверба и нашата заедничка иднина“, вели Заев. 

Вечерта на 8 септември кога дојдов на плоштадот, тој беше веќе полн и во исчекување на резултатите од гласањето на референдумот, напиша на Фејсбук екс премиерот Никола Груевски кој доби политички азил во Унгарија. 

Шефот на државата, Стево Пендаровски по повод 8 Септември, Денот на независноста упати честитка до граѓаните. 

Во неа наведува дека во 1991-та, во неизвесно време, се обединивме околу идејата за своја, независна држава. 

Вели дека тогаш, големиот предизвик, наместо причина за поделби, стана повод за обединување, сите се собравме околу идејата за независна и суверена Македонија, порачува шефот на државата.

Oд ВМРО-ДПМНЕ велат дека сега е време кога треба да покажеме и докажеме со дела и работа колкава е љубовта кон нашата татковина. 

Додаваат дека време е сите да покажеме дека сакаме да живееме во просперитетна и демократска Република Македонија. 

„Овие турбулентни времиња, кога се оспорува македонскиот идентитет, јазик и историјата, докажуваат дека борбата за Македонија никогаш не завршува. Секоја генерација има своја битка и свои победи кои треба да ги извојува. На оваа генерација и беше наметната промена на името на државата и покрај тоа што власта не доби поддршка на референдум. Оваа генерација гледа како се гребат шахти и се преименуваат улици и објекти. Оваа генерација се соочува со обидот да се брише и заборави дел од историјата. Се најавува ревизија на учебниците и промена на обележјата. Наместо да се чува идентитетот, името, јазикот, културата и историјата, власта тргува со се што е свето. Македонија е економски опустошена земја, во која владее криминалот, а не правото“, стои во честитката по повод 8-ми Септември. 

Обвинителките од СЈО Ленче Ристоска и Фатиме Фетаи присуствуваа на прославата за 8-ми септември во Градски Парк.

„Денеска славиме, од вторник за СЈО“, велат тие за Тв21.Добиле покана како претставници од СЈО од Владата и затоа се присутни, но за СЈО не сакаат да коментираат.