Фон дер Лајен ја најави првата транша до крајот на годината, Македонија очекува помош од 52,5 милиони евра

Добивај вести на Viber

Претседателката на Европската комисија, Урсула фон дер Лајен денеска изјави дека земјите од Западен Балкан треба да ја добијат првата транша од финансиската помош за Планот за раст до крајот на годината.

„Пет од шесте реформски агенди ќе бидат усвоени оваа недела и тоа значи дека исплатата на шест милијарди евра од Планот за раст може да започне пред крајот на годината“, изјави таа во Берлин.

Реформските агенди на Македонија, Албанија, Србија, Црна Гора и Косово се одобрени во рамки на новиот Инструмент за реформи и раст во износ 6 милијарди евра, познат како План за раст на Западен Балкан – објави на мрежата „Х’“ унгарското претседателство со ЕУ.

Согласно Планот за раст на Западен Балкан вреден 6 милијарди евра, земјава треба да добие 750 милиони евра поделени на неколку транши, а првата транша од 7 проценти, односно 52,5 милиони евра, државава ќе ја добие најдоцна до крајот на годината.

До крајот на октомври, претседателката на Европската комисија, Урсула фон дер Лајен ќе допатува на неколкудневна турнеја низ земјите од Западен Балкан, а според најавите шефицата на ЕК планира да ја посети и Северна Македонија, потврдија од Делегацијата на ЕУ во Скопје на 10 октомври.