ФОН ДЕР ЛАЈЕН ВЕЛИ ДЕКА БРИТАНИЈА САКА ДА СЕ ВРАТИ ВО ЕУ: Направивме грешка, мора да ја поправите

Добивај вести на Viber

Претседателката на Европската Комисија (ЕК), Урсула дон дер Лајен вели дека Британија е на патот кон повторно приклучување во Европската Унија(ЕУ).  Ги повика младите да го поништат Брегзит.

Таа на доделувањето на наградите POLITICO 28 во Брисел изјави дека на своите деца им кажала дека на следната генерација е да ја „поправат“ грешката од Брегзит.

„Морам да кажам, цело време им велам на моите деца: „Треба да го поправите тоа. Направивме грешка, мора да ја поправите“. Така што и овде мислам дека насоката на движење, што е мое лично мислење, е јасна“, рече таа.

Портпаролот на британскиот премиер Риши Сунак не се согласува дека Брегзит треба да се „поправи“.

Тој изјави дека Британија „има премиер кој се залагал за Брегзит пред тоа да биде во интерес на неговата кариера, бидејќи тој страсно верува во него“.

Анкетите покажуваат дека мнозинството гласачи во Велика Британија би поддржале повторен влез во ЕУ доколку тоа се побара на референдум, пишува Политико.

Последната анкета објавена на крајот на ноември покажува дека 48 отсто од населението се за повторно приклучување, а 36 отсто за напуштање, но ниту една голема политичка партија која има шанси да учествува во владата не предлага повторно пристапување во блокот.