ФОТО ФАКТОР: Почна протестот на приватните превозници, еве кои се нивните барања
Објавено во: Македонија 30 Јануари, 2023
Почна протестот на дел од приватните превозници, како што и најаваија во текот на вчерашниот ден.
Нивниот протест стартуваше од девет часот утрово пред седиштето на ЈСП во Автокоманда.
Тие бараат средба со директорот на ЈСП, а подготвуваат и барања за прием до Град Скопје и до Владата.
Исен Халили од „Макекспрес“ во изјава за МИА рече дека по одржаниот состанок на лица од двете компании „Макеспрес“ и „Слобода превоз“ одлучено е денеска да се протестира. Како што нагласи, целата работа околу решавањето на нивниот проблем се одоговлекува, а тие се без работа и имаат трошоци.
Милорад Димитриевски, еден од сопствениците на „Макеспрес“, потврди дека таков состанок се одржал, но, тој не присуствувал на него.
– Има информации во јавноста дека 5.000 денари биле исплатени на „Слобода превоз“, по кој основ, не знам. Кај нас немаат префрлено ништо од 2 ноември наваму, изјави Димитриевски.
МИА го контактираше и Ленин Јовановски од „Слобода превоз“, кој вчера кажа дека тој лично не е информиран за ваков протест.
Приватните превозници последните месеци од минатата година протестираа блокирајќи неколку сообраќајници во главниот град и барајќи исплата на заостанатите долгови. Откако не наидоа на разбирање кај градоначалничката на Град Скопје, побараа прием кај премиерот Димитар Ковачевски. Во меѓувреме, Град Скопје објави два јавни повика за приватните автобуски превозници, на кои немаше интерес.
Фото Фактор