(ФОТО) Македонци од Швајцарија за Фактор: „Корона паника има и овде, маски и средства ни за лек“

Добивај вести на Viber

Швајцарија е во вонредна состојба. Од петокот учениците се пуштени дома и до крајот на април нема да одат во училиште. Клуч на врата ставија продавниците, рестораните, баровите и други објекти. 

Работат само маркетите за храна и аптеките.

Паниката со коронавирусот ги зафати и Швајцарците. За Фактор, Македонци кои живеат во францускиот кантон велат дека рафтовите во продавниците се празнат секојдневно.

„Вонредната ситуација стапи на сила викендов. Уште тогаш почна да се шири паниката со купување на намирници за дома. Истите слики како во Македонија, се и овде. Првично почна да снемува овошје и зеленчук. Потоа се испразнија полиците со месо, брашно, зејтин, макарони и шпагети и шеќер, но и ориз и тоалетна хартија“, раскажува нашата соговорничка Р.Д. додавајќи дека средства за дезинфекција на раце и маски се наоѓаат многу тешко во аптеките.

Материјал за учење за учениците по пошта

Забранети се секакви собирања по надвор. Децата не смеат да излегуваат и да дружат во парковите, пред училиштата и градинките како што беше случај пред да почне вирусот да се шири и во таа европска земја.

-Од 9 април децата требаше да останат на двонеделен распуст поради Велигденските празници, но во петокот од училиштата ни јавија дека од понеделник (вчера) се затвораат сите образовни установи и распустот почнува порано поради ситуацијата со коронавирусот. Дома ќе бидат до крајот на месецот. Во однос на наставата, за да нема пропусти во материјалот, на сите деца наставниците им праќаат материјал во плик по пошта кој учениците ќе треба сами да го учат додека се дома“, вели нашата соговорничка.

Затворени границите за странски државјани.

Мерка која исто така е донесена поради вирусот е „стоп“ на граничните премини за странски државјани.

-Од ова утро како што слушнавме на телевизија, на границите може да влезат само оние кои имаат дозвола за престој или работна дозвола, што значи дека влезот за странци и туристи е целосно забранет. 

Ние планиравме празниците да дојдеме во татковината, но патувањата ги одложивме поради новонастанатата ситуација. Ги почитуваме препораките и на нашите овде, но и на македонските власти за спречување на ширењето на вирусот. На овој начин што ќе останеме овде ќе се заштитиме и себе а и нашите најблиски. Сметам границите требаше уште многу порано да ги затворат и кој каде се нашол таму да остане барем додека спласне ширењето кои очигледно допрва ќе зема замав - истакнува нашата соговорничка.

Имено, швајцарската влада одобри користење на 8 000 војници за помош во болниците и другите места.

Во таа земја заразата со коронавирус е потврдена кај повеќе од 2300 луѓе, од кои починале 19 лица.

Ирена Ставрова