(ФОТО) ОПАСНО: Од дупка за хотел може да пропадне цела улица кај Италијанска амбасада!

Добивај вести на Viber

  Оголена инсталација од улично осветлување, опасност од поткопување на улицата – ова се случува на улицата 8ма Ударна Бригада, поточно кај Италијанската амбасада, информираат од Општина Центар. Од таму тврдат дека причина за состојбата е огромна ископана дупка, длабока неколку метри, веднаш до улицата, на локацијата на која бизнисменот Зоран Азманов, сопственик на градежната компанија „Настел“, има добиено дозвола за изградба на хотел. „Со копањето на дупката одземен е и дел од тротоарот кој не е во приватна сопственост. За ова уште во месец јануари беше известена фирмата "Настел" за сигурносно да ја обезбеди дупката, но тоа не се случи“, тврдат од општина Центар. „По поројните дождови направено е свлечиште кое претставува голема опасност бидејќи 10 – 20 сантиметри е влезено во улицата, која може во секое време да пропадне. Во исто време, од поројните дождови оголени се инсталациите од уличното осветлување“, предупредуваат од Општината. Инспекторите од општина Центар ги известиле Азманов и неговата компанија "Настел" за опасноста од одронот, а најавуваат дека доколку ова не се санира во одреден рок, ќе се преземат казнени мерки согласно Законот за градење. Инаку, улицата 8ма Ударна Бригада, која што неодамна беше реконструирана од општина Центар, е единствен пристап до 7 станбени објекти, 2 деловни згради и амбасадата на Република Италија во Македонија.