(ФОТО) Ова ја затна фекалната канализација во центарот на Скопје!

Добивај вести на Viber

Кабли од операторите и друг неразградлив материјал беа извадени од фекалниот колектор на булеварот Кочо Рацин во близина на Црвениот крст, со цел да се отстрани големиот дефект што ја блокираше фекалната канализација во централното градско подрачје. Колекторот бил запушен и во близина на Порта Македонија, каде што исто така била потребна интервенција на екипите на ЈП „Водовод и канализација“ со градежна механизација, вакум, цистерни и друга опрема за отпушување, како и едно возило на Противпожарната бригада на Град Скопје. Каблите биле поставени пред повеќе од 10 години. „Причината за запушување на самиот колектор се поставените кабли од страна на операторите кои заедно со неразградливиот отпад (влажни марамчиња, влошки и тн.) кој граѓаните го фрлаат во своите веце школки, претставуваат проблем поради кој не може отпадните води да бидат одведени, односно доведува до нефункционирање на самиот канализационен систем“, информираат од Град Скопје. Од таму апелираат до жителите на Скопје да не фрлаат ѓубре и други материјали во атмосферскиот и фекалниот канализационен систем, како и внимателно поставување на нови инсталации од страна на операторите со цел избегнување на вакви дефекти и непријатности во иднина. Во овој момент екипи од ЕВН Македонија работат на дислокација на четири кабли кои се под висок напон, по што веднаш ќе следи санирање на самиот фекален колектор, на дупките на двете локации и нивно доведување во првобитна состојба.