(ФОТО) Спасувачките екипи цела ноќ не можат да стигнат до заробените рудари во Распоточје

Добивај вести на Viber

Цела ноќ спасувачите се обидуваат да стигнат до рударите заробени во окното на рудникот за јаглен Распоточје во Босна и Херцеговина. Иако босанските власти најпрвин тврдеа дека во рудникот се заробени осум рудари, подоцна се испостави дека дури 34-ца останале отсечени во една од јамите по земјотресот кој предизвика одрон во рудникот. Според медиумите во Босна и Херцеговина, спасувачите напредуваат добро кон заробените рудари, но се уште не стигнале до нив за да ги извлечат. Последниот контакт со заробените рудари бил направен пред околу три часа и сите биле здрави и живи. Семејствата успеале да стапат во контакт со рударите и по телефонска врска. Најголем дел од работите за спасување се изведуваат рачно, бидејќи машините во овој дел на јамата се оштетени и онеспособени за работа. Заробените рудари од своја страна исто така се обидуваат да го расчистат тунелот и да се сретнат со спасувачите. Надежите се дека извлекувањето на рударите ќе започне во следните неколку часа. Претходно во болница беа префрлени двајца повредени рудари, кои не се наоѓаат во животна опасност. Хаваријата во рудникот Распоточје ја предизвика земјотрес со интензитет од 3,5 степени според Рихтеровата скала.