(ФОТО) УШТЕ ЕДНО ГРАДИЛИШТЕ: Се реконструира и улицата кај „Рекорд“

Добивај вести на Viber

Започна реконструкцијата на едната коловозна лента од улицата „Димитрие Чуповски“, во најстрогиот центар на Скопје и најфреквентното градско подрачје. Ќе се поправа улицата пред автобуското стојалиште спроти „Рекорд“, а градежните работи треба да траат до крајот на јули. „Оваа сообраќајна лента ќе се реконструира во должина од 200 метри, пред и по ова автобуско стојалиште. Оштетениот и вдлабнат асфалт ќе се изгребе, на делови каде што коловозот е многу оштетен ќе се санира и потповршинскиот слој и ќе се асфалтира со нов асфалт. Во текот на реконструкцијата на сообраќајната лента ќе се нивелираат и постојните шахти и сливници. Поради изведување на градежните работи, за сообраќај целосно ќе се затворат двете сообраќајни ленти од улицата Димитрие Чуповски, во насока од болницата „Наум Охридски“ (старата Градска болница) до такси-станицата „Ловец“, вели градоначалникот Коце Трајановски. Сообраќајот ќе биде пренасочен по следниве улици: од крстосницата кај старата Градска болница, односно, крстосницата со улицата Васил Аџиларски и улицата 11.Октомври, возилата ќе се движат преку улицата 11.Октомври, булеварот Кочо Рацин и улицата Свети Кирил и Методиј до булеварот Свети Климент Охридски. Возилата на јавниот градски транспорт ќе бидат пренасочени по истата траса и ќе ги користат постојните автобуски стојалишта. Сообраќајот по улицата Димитрие Чуповски, од ТЦ „Палома бјанка“ кон старата Градска болница, ќе се одвива без промени. „Градот Скопје апелира до сите учесници во сообраќајот да се придржуваат на привремениот сообраќаен режим и да ја почитуваат поставената сообраќајна сигнализација“, вели Трајановски. На изведбата на градежните работи ќе работи градежната фирма „Бетон“-Скопје, а поправката ќе го чини градот околу четири милиони денари.