(ФОТО) Вулканот Косел – причина за загриженост или дезинформација?

Добивај вести на Viber

Деновиве некои медиуми во Македонија а и во регионот „кренаа прашина“ околу таканаречениот вулкан во Косел, охридско, заплашувајќи ги луѓето дека  истиот почнал да се активира.

Што всушност претставува Косел?

Косел село во општината Охрид. На прв поглед, охридското село Косел ќе ви изгледа како едно обично македонско крајпатно село, чиј почеток и крај се означени со големи жолти табли. Така е сe додека да стигнете некаде до средината на селото, кога ќе почувствувате чуден мирис.

Селото се наоѓа на 7 км северно од Охрид, на регионалниот пат Охрид - Битола, на Коселска река.

Сулфатарата “Дувало” претставува активна поствулканска појава која се наоѓа во непосредна близина на селото Косел, недалеку од Охрид. Има изглед на минијатурен кратер со пречник од 0,5 м и длабочина од 30 см. Од отворот избиваат гасови на јаглен диоксид и сулфур водород заради што оваа појава во исто време е и мофета и сулфатара. Претставува последен знак на изумирање на некогашна вулканска активност.

Сулфатарата Дувало во Косел е поствулканска појава една од ретките од ваков вид во овој дел на Европа. Со самиот ваков карактер сулфатарата преставува природен феномен, поради што во 70-тите од страна на Собранието на Општина Охрид добила статус на природна реткост. Упатените сметаат дека коселскиот “вулкан“ недоволно е искористен и наместо туристичка атракција, тој денес претствува депонија.

„Косел во поранешна Југославија се учеше во учебниците по географија за основно образование како ретка геолошка појава, опишувана како единствениот активен вулкан на Балканот. Всушност, станува збор за раседна пукнатина, или пукнатина во подлабоките слоеви на земјата од која на земјината површината избиваат гасови од подлабоките слоеви. Тоа е последица од вулканската активност што се случувала на територијата на денешна Република Македонија пред еден,два или пет милиони години, за која сведочат некои ридови во Кумановско-кратовскиот регион. Станува збор за уникатна појава, можеби единствена на Балканот од тој вид, иако такво нешто има и во Романија. Значи, од научен аспект, ова не е вулкан - туку пукнатина од која излегуваат гасови. Тука немало излевање на магма на површината“ - д-р Драган Калчаковски, професор на Институтот за географија на Природно-математичкиот факултет во Скопје.

Значи, потреба за загриженост не постои, а доколку добро се уреди околината ова место може да биде составен дел од туристичките атракции во Охрид.