(ФОТОГАЛЕРИЈА) ТОПЛО ДОБРЕДОЈДЕ ЗА КОВАЧЕВСКИ И ВЛАДИНАТА ДЕЛЕГАЦИЈА ВО СОФИЈА: Утре ќе бидат потпишани неколку билатерални документи
Објавено во: Македонија 24 Јануари, 2022
Премиерот Димитар Ковачевски, кој ја предводи владината
делегација во официјалната посета на Бугарија, попладнево со највисоки државни
почести беше пречекан на плоштадот „Александар Невски“ во Софија.
Ковачевски и владината делегација официјално беа пречекани од бугарскиот премиер Кирил Петков. Двајцата премиери положија венци пред Споменикот на непознатиот војник, јави известувачот на МИА од Софија.
За утре наутро е закажана заедничката седница на владите на двете земји, која ќе се одржи во резиденцијата „Бојана“. На седницата воведно обраќање ќе имаат двајцата премиери, Ковачевски и Петков, по што ќе почнат разговорите, откако Скопје и Софија, претходни ги формираа работните групи со кои треба да се интензивира соработката во периодот што претстои.
За утре е предвидено и потпишување на неколку билатерални документи, меѓу кои и Меморандум за разбирање за развој на железничко поврзување меѓу Република Северна Македонија и Република Бугарија „Скопје-Софија“, а по завршувањата на меѓувладината седница, Ковачевски и Петков ќе одржат прес-конференција.
Заедничката седница следува по минатонеделната официјална посета на бугарскиот премиер Петков на Скопје. Северна Македонија и Бугарија во периодот што претстои, а во рамки на новата динамика на соработка, која ја најавија двајцата премиери Димитар Ковачевски и Кирил Петков, треба преку состаноците на работните групи да ги приближат позициите во повеќе сфери, да се фокусираат на она што е практично остварливо во моментот, а со тоа да се отвори пат и за пронаоѓање решенија за потешките прашања и конечно надминување на спорот и одблокирање на почетокот на првата меѓувладина конференција на Северна Македонија и Европската Унија.
Најавена е динамична работа на работните групи, секоја недела една од групите да има состанок. Приближувањето ќе се спроведува прагматично, најпрво онаму каде што нема препреки, а веќе како прв проект е најавено воведувањето на директната авиолинија Скопје-Софија, што како што рече Петков во Скопје би се реализирал за два месеца.