Добивај вести на Viber
Организаторите на протестите во Бугарија преку социјалните мрежи порачаа дека не се откажуваат од демонстрациите и покрај оставката на бугарскиот премиер Бојко Борисов.
„Не дозволувајте да бидеме испровоцирани со оваа оставка и да се повлечеме. Ова е манипулација за да престанеме! Но, дури сега се почнува“, порача еден од организаторите и ги повика Бугарските граѓани на улица.
Денеска бугарскиот премиер Бојко Борисов си поднесе оставка и ја распушти Владата исканувајќи дека не сака да премиер во држава во која полицијата ги тепа граѓаните.
Оставката на Борисов следи по еднонеделните протестите на граѓаните кои бараат намалување на цената на електричната енергија.Борисов изненадувачката одлука ја соопшти утринава во бугарското собрание, а само 24 часа претходно тврдеше дека нема да се повлече.
„Уште еднаш им благодарам на сите што не подржуваа. Колеги денеска нема да правиме структурни промени. Ја завршуваме седницата а на пладне ќе поднесам оставка на кабинетот и се надевам дека ќе биде прифатена. Ви посакувам пријатен ден“, изјави Бојко Борисов, премиер на Р. Бугарија.
Во парламентот присуствуваше целиот кабинет, а бугарскиот премиер категорично изјави дека владата направила се што е во нејзина моќ за да одговори на барањата на демонстрантите. Тој додаде дека неговата партија нема да учествува во преодната влада.
Борисов ја презеде власта во јули 2009 година. Редовните парламентарни избори требаше да се одржат во јули, но аналитичарите во Бугарија сметаат дека се можни предвремени парламентарни избори на крајот на април.
Дел од аналитичарите се на ставот дека потегот на Борисов се случува во момент кога неговиот рејтинг е доста низок.
За време на вчерашните демонстрациите во Софија, дојде до судири меѓу демонстрантите и полицијата, при што беа повредени 11 лица.
Според бугарските медиуми, во полициски притвор биле задржани 11 демонстранти.