ФЗОМ воведе електронски трезор за плаќање преку интернет од страна на ЈЗУ

Електронски трезор, односно електронско поднесување на налози за плаќање преку интернет од страна на јавните здравствени установи, е првата електронска услуга која од 8 октомври ја воведе Фондот за здравствено осигурување. Фондот од јануари  ќе работи со болниците само со електронски налози. Станува збор за услуга која се овозможува за 111 ЈЗУ кои ги користат капацитетите на Фондот од минатата година како нивен трезор, односно кога ФЗОМ стана посебен носител на платниот промет за сите ЈЗУ. Ова денеска го истакна директорот на Фондот, Маја Парнарџиева Змејкова која истакна дека електронскиот трезор е прв во државата воведен од страна на ЈЗУ, бидејќи, како што посочи, електронско банкарство го овозможуваат приватните банки, а кај јавните институтции тоа досега не беше овозможено. - За нешто повеќе од година ипол како Фонд го надминавме и лидерот во воведување на трезорот, а тоа е Министерството за финансии кој го воведе во 2001 година. Досега вработените во болниците доаѓаа редовно секојдневно во нашите подрачни служби со потпишани налози од нивните директори за нивните налози за плаќање да ги реализираме преку нашиот софтверски систем од една на друга сметка, изјави Парнарџиева Змејкова. - Имаме 111 ЈЗУ, а веќе 60 од нив се регистрираа во нашиот електронски трезор, добија пасворд, имаат електронски потпис и немаат потреба никогаш повеќе да се појават во подрачните служби на Фондот. Регистрираните болници преку интернет ни ги доставуваат налозите за плаќање, ние ги примаме и реализираме, што значи растеретување на службите во болниците и во Фондот и брзо и без грешка, ефикасно завршување на плаќањата без задоцнувања, објасни директорката. Директорот на сметководство и трезор во Фондот, Маја Богдановска Стојановска посочи дека со воведување на електронското банкарство ќе се обезбеди заштеда на околу два милиони денари на годишно ниво.