ГАК СО ДЕТАЛИ ЗА ПОЧИНАТАТА 33 ГОДИШНА ПАЦИЕНТКА - имала претходни болести, лекувана е по сите протоколи

Добивај вести на Viber

За случајот на починатата пациентка од Охрид, министерот за здравство, Венко Филипче денеска рече дека доцна синоќа прочитал за случајот, а денеска ќе биде спроведен надзор преку Државниот здравствен и санитарен инспекторат.

Инаку, според објавите на социјалните мрежи, пациентката починала на Клиниката за гинекологија и акушерство, од рутинска операција на миом. 

„Ќе иницираме соодветен надзор преку Државниот санитарен и здравствен инспекторат, а доколку е потребно, и стручен надзор“, изјави Филипче, одговарајќи на новинарско прашање по денешната прес-конференција.

Од Клиниката за гинекологија и акушерство во соопштение до јавноста појаснуваат дека не се работи за родилка како што тоа е објавено на социјалните мрежи, туку за пациентка која е оперативно третирана. Пациентката, според соопштението од ГАК, починала утрово на КАРИЛ.

„Пациентката е примена на ГАК на 21.04.2021 година со голем тумор на матката и е извршена операција на 22.04., со уреден оперативен тек. Во првите шест дена пациентката е стабилна и е на исхрана преку уста. Шестиот постоперативен ден, поради нагло влошување на состојбата (силна болка), пациентката повторно е подложена на оперативен зафат во присуство на абдоминален хирург заради утврдување на причините за влошување на состојбата. Интраоперативно е најдена спонтана руптура на тенко црево (најверојатно како резултат на претходните болести). Во договор со абдоминален хирург, пациентката е префрлена на Клиниката за дигестивна хирургија. На 11-от ден постоперативно, на Дигестивна хирургија, настанува повторна компликација со цревата најверојатно поради претходните болести и пациентката е повторно оперирана. Постооперативно пациентката е во стабилна состојба и хоспитализирана на Клиниката за дигестивна хирургија. Утрото на 09.05.2021 година, под сомнение за белодробна тромбоемболија, пациентката итно е префрлена на КАРИЛ, каде починала по многу кратко време“, се појаснува во соопштението.

На социјалните мрежи беше објавено дека 33-годишна родилка починала на ГАК и оти наместо папочната врвца, и биле пресечени цревата.

Воедно, од ГАК информираат дека по добиените информации од Дигестивна хирургија за комликациите и лошиот исход на пациентката, денеска под итно се состана Комисијата за контрола на квалитет при ЈЗУ У ГАК – Скопје и ја разгледа целата документација од приемот до исписот на Клиниката за дигестивна хирургија.

„Комисијата заклучи дека пациентката е лекувана и третирана по сите протоколи, под висок стручен надзор, заради нејзината претходна состојба и дека е постапено со лекување и третман за високоризични пациенти. Комисијата за контрола на квалитет при ЈЗУ У ГАК ќе се состане повторно по добивање на судско-медицинскиот наод. ЈЗУ У ГАК-Скопје изразува длабоко сочувство до семејството на починатата пациентка за нивната голема загуба“, се посочува во соопштението од Гинеколошко-акушерската клиника.