Гасоводот „Јужен тек“- спас или нова јамка за Македонија?

Добивај вести на Viber

Власта и опозицијата повторно се спречкаа во Собрание, денеска за ратификацијата на спогодбата со владата на Русија за „Јужен тек“ кој беше на дневен ред пред пратениците. Законот за ратификација на Спогодбата беше изгласан доцна попладнево, а како што изјави заменик-министерот за надворешни работи Зоран Петров, целта на овој договорот е обезбедување еколошки и поевтин енергенс кој ќе ги намали трошоците за работа на фирмите и ќе ја зголеми конкурентноста на производството. За опозицијата пак, ратификувањето на Спогодбата е авантура, а дека процесот на гасификација е следен со лажни ветувања и криминални активности, што на крај ќе доведе земјава да стане енергетски заложник од снабдувачот со гас. „Процесот на гасификација го пратеа многу лажни ветувања и криминални активности, а ратификацијата е спротивна на законите. Со неа, на една компанија ќе и се овозможи да увезува по повластена цена, да добива јавни набавки по приоритет и сама да ја дефинира цената“, изјави Јани Макрадули од СДСМ. Според пратениците од владината коалиција, изградбата на гасоводот е врз партнерска основа и не е само руски проект, туку на Европската унија и Руската Федерација, а заменик министерот за финансии Ардијан Џеладини рече дека ставоите на Макрадули немаат врска со реалноста и не смее да се потценува проектот. Пратениците од СДСМ реагираа до власта и поради тоа што на дискусијата по овој стратегиски проект за Македонија не е присутен ниту еден нејзин претставник. Спогодбата која во јули беше потпишана на меѓувладино ниво за приклучување на земјава кон Јужен тeк,  прво ќе треба да се изготви анализа која треба да ја одреди техниката, економската , еколошката и финасиската оправданост на реализацијата на проектот гасоводен крак. Сеуште не се знае од каде ќе биде пуштен крак за сабдување на Македонија со рускиот гас. Руски Газпром допрва ќе решава дали кракот ќе го направи преку Србија или Грција. Плановите велат дека гасоводот „Јужен тек“ треба да биде готов до 2015 година, кога ќе протечат првите количини гас кон Централна и Јужна Европа. Според најавите, капацитетот ќе биде 63  милијарди метри кубни годишно или 14 проценти од вкупните потреби на Европа.