Гаспром: Можни се прекини на испораката на гас во Европа преку Украина

Добивај вести на Viber

Рускиот гасен гигант Гаспром предупреди денес дека можни се прекини во испораката на гас во Европската унија преку Украина, наспроти руско – украинскиот договор од Брисел за решавање на спорот околу гасот. „И понатаму постојат ризици во дистрибуцијата на гас преку територијата на Украина оваа зима, бидејќи Украина, поради своите финансиски проблеми не беше во можност да ги купи неопходни количини на гас во ноември и декември минатата година и затоа што нејзините резерви на гас во подземјите складишта значително се намалени“, рекол директорот на Гаспром, Алексеј Милер. Директорот на Гаспром ја предупредил ЕУ дека ќе мора со сопствени средства да си обезбеди гас кога Гаспром ќе заврши со изградбата на турскиот гасовод по напуштање на проектот Јужен тек. Потпретседателот на Европската комисија, Марош Шевќович денес престојува во Москва, во посета посветена на изградбата на гасоводот кој треба да поминува преку територијата на Турција до границата на Европската унија. „Турскиот гасовод ќе биде единствен гасовод преку кој ќе се испорачуваат 63 милијарди кубни метри руски гас, кој во моментов поминува преку територијата на Украина. Други можности нема“, се наведува во соопштението на Милер по состанокот со Шевќович. Рускиот премиер Дмитриј Медведев предупреди денес дека Москва има право пред време од Украина да бара отплата на долгот од три милијарди долари и дека наскоро ќе донесе одлука по основ на ова прашање. Русија и одобри на Украина кредит од 15 милијарди долари во декември 2013 година кога на власт беше прорускиот украински претседател Виктор Јанукович. По исплатата на три милијарди, Русија го поништи договорот поради промена на режимот во земјата.