ГАЗА: Бројот на загинати Палестинци надмина 22.000
Објавено во: Свет 02 Јануари, 2024
Од 7 октомври лани досега во Газа загинале над 22.000 Палестинци. Само во последните 24 часа загинале 207 луѓе.
Министерството за здравство во Појасот Газа, што е под контрола на Хамас, денеска соопшти дека во израелските воени операции досега се загинати 22.185 Палестинци.
Палестинското Министерство за образование соопшти дека најмалку 4.037 ученици и 209 образовен персонал се убиени.
Претходно беше соопштено дека две третини од убиените се жени, деца и малолетници. Француските медиуми објавија дека од почетокот на војната ранети се 57.035 Палестинци.
На израелска страна, досега се убиени над 1.200 лица, од кои повеќето се цивили. На 7 октомври лани на југот на Израел беа киднапирани околу 240 лица и однесени во Појасот Газа, а според израелските власти Хамас и другите милитанти во Газа држат уште 129 заложници. Во израелските копнени операции во Појасот Газа досега загинаа околу 170 војници.
Високиот комесар на ОН за човекови права, Волкер Турк, гледа знаци на воени злосторства, а можеби и злосторства против човештвото во војната во Газа, јави ДПА.