Газдите на „Биотек“ во експанзија, купуваат акции и се здружуваат со контроверзен бизнисмен
Објавено во: Економија 13 Септември, 2023
По остварените надпросечни приходи и добивки за време на корона кризата, семејството Синадинови како сопственици на „Биотек Лабораторија“ во изминатиот период се во вистинска инвестициска експанзија.
Компанијата која стана особено позната откако спроведуваше ковид тестирање во својот синџир лаборатории, минатата недела стана нов познат акционер во фармацевтската компанија „Реплек“ со удел од 6,3 отсто. „Биотек“ преку ноќ стана петти најголем сопственик откако за 1.115 акции плати 1,23 милиони евра
Во декември лани Биотек групацијата ја прошири својата палета на услуги, отворајќи и нова Поликлиника Биотек, во центарот на Скопје со Анкица Синадинова - Базерко како нејзин управител.. Поликлиниката, како што тогаш беше соопштено за медиумите, работи со дејностите педијатрија, гинекологија, интерна медицина, трудова медицина и трансфузиона медицина.
Во текот на ова лето семејството Синадинови одлучува да инвестира и во градежниот сектор. Мартин Синадинов преку фирмата Ахема ја основа компанија МДА Доо Скопје за изградба на станови и други објекти. Тоа го прави заедно со „Електрометал“ на Александар Стојкоски.
Третиот член на семејството сопственици на „Биотек“ - Дејан Синадинов со истата фирма „Ахема“ на крајот на изминатиот месец ја основа „Унион Констракшн“ за изградба на станбени и нестанбени згради. Партнер на Синадинов преку „Нисабеја“ е контроверзниот македонски бизнисмен Дритон Шуки.
Минатата година беше објавено дека косовската полиција спречила украдена медицинска опрема од Македонија да заврши во косовската поликлиника „Авицена КС“ во сопственост на Шуки. Косовските медиуми јавија дека станува збор за опрема вредна 45 илјади евра, а бизнисменот истата наводно ја купил за 10 илјади евра.
За скопјанецот беше објавено дека има бизнис во Косово и Македонија и дека е поврзан со политичари од двете земји. Како што објави косовската полиција на 17 ноември, бил сослушан и е осомничен дека направил кривично дело со купување на медицински апарат кој се сомничи дека е украден во Скопје.
Македонските медиуми пак објавија дека Шуки во 2019 година донирал 32.000 евра на ДУИ. Како што објави „Радио Слободна Европа“, во декември 2019 година Шуки станал член на Централниот одбор на ДУИ и истата година бил најголем донатор на партијата.
Инаку, компанијата Биотек е основана 1999-тата година со основна дејност работа со медицински потрошен материјал и опрема за клинички и индустриски сектор. Во 2015 година Биотек го прошири своето работење и отвори ланец лаборатории во Скопје. Лани беше најавено и дека во тек е отворањето на прва приватна генетска лабораторија во Македонија.
Инаку лани Биотек имал приходи од 11,5 милиони евра и добивка од 1,4 милиони евра.
Александар Кузмановски
Можеби ќе ве интересира
ГИ СОВЕТУВАМ ЛУЃЕТО ДА КУПУВААТ ЗЛАТО, ПРИЧИНАТА Е ТОА ШТО ДОПРВА ДОАЃА: Познат руски економист го вклучи алармот
ШТРАЈКОВИ ВО ЕВРОПА ЗА КОИ ТРЕБА ДА ЗНАЕТЕ: Незадоволството на работниците поради платите ќе им „се удри од глава“ на туристите
И ВИКЕНДОВ СЕ РАБОТИ: Владата го „крчка“ новиот буџет еве за што ќе се трошат парите
„НЕКОЈ СЕ КИТИ СО ТУЃИ ПЕРЈА И ОБЈАВУВА ИВЕСТИЦИЈА КАКО СВОИ“: Битиќи со благодарност до ВМРО-ДПМНЕ што ги продолжуваат неговите планирани инвестиции
„ВО ДРЖАВНАТА КАСА КАКО ДА ПОМИНАЛО ЦУНАМИ, ВО КАТАСТРОФАЛНА СОСТОЈБА Е“: Опустошена е, вели Мицкоски
ШЕСТДНЕВНА РАБОТНА НЕДЕЛА: Стапува законот во Грција, работникот ќе добие 40 проценти повисока плата, а не смее да работи повеќе од 8 часа
УЈП: Регистрирана првата странска компанија за целите на ДДВ преку даночен застапник
ПОСКАПЕ КАКАОТО: Се зголеми и цената на чоколадите во повеќе земји
ПРОМЕНИ ВО ИТАЛИЈА: Колкава е стапката на невработеност?
