Георгиевски: Знам дека е кршење на законот, но не можев да ја упропастам туристичката сезона
Објавено во: Македонија 03 Октомври, 2019
Константин Георгиевски, градоначалникот на Охрид, во интервју за А1он вели дека се нашол помеѓу два огна изминатото лето - дали да ги затвори плажите кои работеле нелегано и со тоа да ја упропасти туристичката сезона или пак да замижи пред законот, при што го одбрал ова второто како, според него, помало зло.
Охридските плажи немаат концесионери и по неколку години, но со нив и натаму се стопанисува. Најави дека по судски пат ќе бара узурпаторите да платат за користењето на плажите иако немале договор со општината.
- Доаѓаше туристичка сезона, проценив дека би било непопуларно за туризмот среде сезона да ги отстрануваме плажите. Свесен сум дека тоа е прекршување на законот, меѓутоа јас и сега кога разговарав со лицата што располагаат со плажите, еден од локалите ми дојде со список од 32 вработени и тука беше истиот муабет – да се најде решение. Ние по судски пат, за периодот за кој не се плаќал надоместок за концесија, тоа ќе го наплатиме. Ќе ги заштитиме интересите на Општината. Парите ќе ги бараме од правните субјекти“, рече Георгиевски.
Дополни дека постои идеја општината законски да ги купи објектите и реквизитите во кои приватните узурпатори вложиле, а потоа да ги издава заедно со земјиштето.