Германците прават нов проект, ќе се гради пругата кон Бугарија

Добивај вести на Viber

Иако почна да се гради пред две децении, изградбата на железничката пруга од Бељаковце до Крива Паланка повторно ќе почне, овојпат за две години. Пругата ќе биде долга околу 36 километри и е дел од Коридорот 8, а изработката на главниот проект ќе го прави германската консултантска компанија Обермаер (Obermeyer Hellas Ltd),од Минхен. Договорот беше потпишан денеска, по што Германците ќе треба да ја одредат најповолната траса на минување на пругата. Само проектот чини 2,4 милиони евра, пари обезбедени со грант од ЕБОР. Стариот проект, кој го изработија геометрите од Гранит пред дваесетина години, нема да се користи. Ќе се гради одново и она што беше претходно изградено, како голем број носечки столбови и поврзувања будејќи, како што посочуваат од железница,  потребно е новата пруга што ќе биде во согласност со стандардите на Европската железничка асоцијација. Пругата до Бугарија, која е дел од Коридор 8 треба да биде готова до 2022 година, а за неа, појасни министерот за транспорт и врски Миле Јанакиески, ќе се бараат средства од ИПА фондови. „Планирано е оваа година да се склучи договор за првата делница од Куманово до Бељаковце, а согласно денешниот договор, до 2015 година треба да имаме компанија и за втората делница од Бељаковце до Крива Паланка. За последната делница од Крива Паланка до Бугарија ја имаме доставено целокупната документација до Европската комисија и чекаме одобрување. Очекуваме во текот на оваа година да се распише повик за ангажирање на консултантска компанија која ќе го изработи проектот за оваа делница“, изјави Јанакиески. За првата делница Куманово - Бељаковце која е планирано да заврши до 2017 година се обезбедени 46,4 милиони евра од Европската банка за обнова и развој.