Германците бараат 30 часовна работна недела, но полна плата?!?

Добивај вести на Viber

Група од 100 германски научници, синдикални активисти и политичари повикаa на 30-часовнa работна недела при што на вработените ќе им биде дадена плата за полно работно време, пренесе Ројтерс цитирајќи го германскиот весник „Tageszeitung“. Главниот аргумент на обединетите зад оваа теза е дека кратката работна недела е најдобар начин државата да се справи со зголемената невработеност. Нивото на невработеност во земјата, кое достигна 7,4% во јануар, според официјалната статистика, останува доста подобро од Шпанија на пример каде невработени се 26% од жителите. Во отвореното писмо објавено денеска, од групата истакнуваат дека намалувањето на работните часови може да им помогне на германските работници. Според нивниот план, изработен од политичари од левицата, филозофи и научници, 30-часовната работна недела може да биде воведувана постепено во рок од неколку години. Таа би требало да ја подобри значително продуктивноста, тврдат тие, што за возврат ќе им помогне на работодавците да плаќаат полни плати. „Имаме потреба од сеопфатен социјален проект за намалување на работните часови. Ова повеќе не може да биде само прашање на политиката на колективно преговарање ", вели за германскиот весник,  Хаинан-Јозеф Бонтруп, професор по трговско право во Вестфалскиот универзитет и еден од главните борци за промената. Според зборовите на Бонтруп,  синдикалните водачи тврдат дека работниците не сакаат пократка работна недела, бидејќи стравуваат дека тоа ќе доведе до намалување на платите и повисоко оптоварување. Тој, сепак, забележува дека таквото мислење е последица на недостаток на елементарно разбирање. „Дури и некои синдикални лидери не разбираат основни работи кои се учат во првиот семестар од обуката по економија", вели германскиот професор.